Kimwe n’ahandi mu Gihugu, mu Turere tugize Intara y’Iburengerazuba, ku wa 08 Werurwe 2026, hizihijwe umunsi mpuzamahanga w’umugore ku nsanganyamatsiko igira iti:” Umugore ni uw’agaciro”. Ku rwego rw’Intara ibirori bikaba byarabereye mu Karere ka Rutsiro aho Guverineri w’Intara y’Iburengerazuba, Ntibitura Jean Bosco, ari kumwe n'Abadepite n'Abasenateri, yifatanyije n’abaturage b’Umurenge wa Kivumu, ahatashwe inzu zigera kuri 70 zubakiwe imiryango yasenyewe n’ibiza. Izi nzu zubatswe ku bufatanya bw’Akarere na Minisiteri y’imicungire y’ibiza (MINEMA), aho inzu 52 kuri 70 zatashwe ari iz’imiryango iyobowe n’abagore. Ni ibirori byaranzwe n’ibikorwa bitandukanye aho abagore bishimiye ibyo bamaze kugeraho n’uruhare bagira mu iterambere ry’igihugu.

Mu ijambo rye, Guverineri w’Intaray’Iburengerazuba, yagaragaje ko amateka y’isi agaragaza ko umugore yabayeho mu ihezwa ku burenganzira bwe haba mu muryango avukamo haba n’uwo yashatsemo ndetse akaba ataranagiraga uburenganzira no ku mahirwe yatangwaga n’igihugu kuko hari byinshi atemererwaga nk’umugore.  Yashimiye ubuyobozi bukuru bw’igihugu bwashyizeho politiki y’uburinganire, umugore agahabwa umwanya mu muryango nyarwanda, ibi bikaba byaratumye agira uruhare mu iterambere rye ubwe, iry’umuryango n’igihugu muri rusange.

Abagore ba Rutsiro bari babukereye 

Umuyobozi w’Intara yishimiye intambwe imaze guterwa mu kwimakaza ihame ry’uburinganire n’iterambere ry’umuryango, ashima abagore n’abakobwa batinyutse bakaba bafite uruhare mu buzima bwose bw’igihugu mu kubaka iterambere ryabo n’iry’igihugu kandi bakaba bagira uruhare mu kukirinda kuko bari no mu nzego zishinzwe umutekano, agira ati: “Abagore bafite uruhare muri byose, kandi barashoboye muri byose.”

Umuyobozi w’Intara kandi yaboneyeho gusaba abagore n’abagabo gufatanya mu gukumira amakimbirane mu muryango, kurinda abangavu inda zidateguwe, kurwanya igwingira ry’abana, guharanira ko abana badata ishuri no kwita ku isuku n’isukura.

Ibi birori byo kwizihiza umunsi mpuzamahanga w’umugore byaranzwe kandi no gusezeranya imiryango 16 yabanaga mu buryo butemewe n’amategeko, gushimira abagore 15 babaye indashyikirwa mu bikorwa bitandukanye by’iterambere ndetse no koroza abaturage amatungo magufi n’amanini.

Inzu zubakiwe abaturage basenyewe n'ibiza