Kuri uyu wa 14 Werurwe 2022, mu Turere tugize Intara hatangijwe urugerero Inkomezabigwi icyiciro cya 9, rw’abanyeshuri barangije amashuri yisumbuye mu mwaka wa 2020/2021. Ku rwego rw’Intara imihango yabereye mu Karere ka Rubavu, Umurenge wa Gisenyi aho byatangijwe na Minisitiri w’Ubumwe bw’Abanyarwanda n’Inshingano  Mboneragihugu, Dr. Bizimana Jean Damascène ari kumwe na Guverineri w’Intara y’Iburengerazuba, Habitegeko François.

Mu ijambo yagejeje kuri izi ntore, Dr. Bizimana Jean Damascène yashimiye ababyeyi bemeye kohereza abana babo ku rugerero asaba uru rubyiruko ko muri iyi minsi bazamara ku rugerero waba umwanya wo gutekereza ku muco w’ubutore bakaba Intore mu buryo buhamye.

Uru rubyiruko rwasabwe kwitwararika no kwirinda kwishora mu ngeso mbi zishobora no kubangiriza ubuzima bw’ejo hazaza birinda ubuzererezi, ikoreshwa ry’ibiyobyabwenge no kwirinda inda zidateganyijwe.

Minisitiri Bizimana Jean Damascene yibukije urubyiruko ko n’ubwo gukomeza kubana no gufatanya n’amahanga ari ngombwa ibisubizo by’ibibazo Igihugu kigifite bigomba gukomeza kuva mu Banyarwanda ubwabo abibutsa kwigira ku mateka kugira ngo bagire umwete wo gusigasira ibyagezweho.

Yagize ati:’’ U Rwanda n’ubundi ruzazamurwa natwe ubwacu, ntabwo tuzahora duteze amaso n’amatwi n’amaboko amahanga ahubwo amahanga tugomba gufatanya ariko nitwe tugomba kwishakamo ibisubizo. Nitwe tugomba kwiteza imbere, nitwe tugomba kwiyubakira Igihugu nitwe tugomba kukirinda, nitwe tugomba natwe ubwacu kwiteza imbere n’Igihugu tukagiteza imbere.’’

Izi ntore z’Inkomezabigwi zasabwe kuzarangwa n’indangagaciro zirimo; Ubutwari, Kuba umugabo (kuba hejuru ya byose, guhora urangwa n’ishema), Ubumwe, Ubupfura, Ishyaka, Kugira ubwangamugayo, Kugira ubwitange, Ubufatanye n’ubushishozi.

Uru rubyiruko mu Karere ka Rubavu rugera kuri 860, mu byo bazakora nk’uko babihigiye imbere ya Minisitiri Bizimana harimo kubaka amazu 13, ubwiherero 152, uturima tw’igikoni 206 ku baturage batishoboye no gukora ibiganiro ku mateka y’u Rwanda n’uburyo ubumwe bw’Abanyarwanda bwasenywe, Itegurwa n’ishyirwa mu bikorwa rya Jenoside yakorewe Abatutsi ndetse no ku cyerekezo cy’Igihugu.

Gutangiza urugerero muri Rubavu byaranzwe n’ibikorwa bitandukanye birimo, gutera ibiti by’imitako ku muhanda no gukora isuku ku rwibutso rwa Jenoside yakorewe Abatutsi rwa Gisenyi, mu wego rwo kwitegura kwibuka ku ncuro ya 28 Jenoside yakorewe Abatutsi. Urugerero rw’Inkomezabigwi muri uyu mwaka rufite insanganyamatsiko igira iti: “Duhamye umuco w’ubutore ku rugerero rwo kwigira”, igamije gukangurira urubyiruko kwishakamo ibisubizo bibageza ku iterambere badategereje akimuhana ariko bigendanye n’indangagaciro na kirazira.

Mu Ntara y’Iburengerazuba Inkomezabigwi zizitabira uru rugerero zigera ku 6779. Biteganyijwe ko urugerero ruzasozwa tariki ya 25 Gicurasi 2022.

Urubyiruko rwahigiye imbere ya Minisitiri ibikorwa ruzakora