Mu Karere ka Rubavu, ku wa 01 Gicurasi 2022, habereye muhango wo kwibuka ku nshuro ya 28 Jenoside yakorewe Abatutsi mu 1994, ku rwibutso rwa Gisenyi, ahazwi nko kuri “Commune Rouge” 

Ni umuhango witabiriwe na Perezidante w’Umutwe w’Abadepite, Mukabalisa Donatille,Minisitiri w’Ubucuruzi n’Inganda, Habyarimana Béatha,Visi Perezida wa Sena, Nyirasafari Espérance, Guverineri w’Intara y’Iburengerazuba, Habitegeko François, Abasenateri, Abadepite, Inzego z’umutekano, Imiryango y’abafite ababo bashyinguye kuri uru rwibutso n’abaturage ba Rubavu.

Mu kiganiro yatanze ku mateka ya Jenoside yakorewe Abatutsi mu yahoze ari Perefegitura ya Gisenyi, umushakashatsi kuri Jenoside Tom Ndahiro yagarutse ku bacurabwenge ba Jenoside bahakomoka n’uruhare rwabo mu bwicanyi bahabereye, aba barimo Bagosora Théoneste, Mugesera Léon, Ngeze Hassan, Nsengiyumva Anatole, Bikindi Simon n’abandi. Uyu mushakashatsi yagaragaje ko muri iyi Perefegitura ariho habaye igerageza rya Jenoside mbere y’1994 aho Abagogwe ndetse n’Abatutsi bo muri Kibilira bishwe bitwa ibyitso by’Inkotanyi.

Bwana Tom Ndahiro yavuze ko uru rwibutso rushyinguyemo abatutsi bakomoka mu yahoze ari Perefegitura ya Gisenyi cyane ko umutekano muke wabaga watumaga abantu benshi bahungira mu Mujyi wa Gisenyi. Kimwe n'abahagarariye Abarokotse, yaboneyeho gusaba ko muri uru rwibutso hashyirwamo inyandiko zigaragaza amateka ya Jenoside muri Gisenyi kugira ngo n’abato batabaye muri aya mateka bazajye bayasoma.

Perezidante w’Umutwe w’Abadepite, Mukabalisa Donatille mu ijambo rye yihanganishije abarokotse Jenoside yakorewe Abatutsi mu 1994, avuga ko kunamira no guha icyubahiro abazize Jenoside yakorewe Abatutsi ari inshingano za buri wese. Yashimiye Nyakubahwa Perezida wa Repubulika, Paul KAGAME n’ingabo yari ayoboye kuba barabohoye Igihugu, yishimira intambwe nziza mu iterambere Igihugu kimaze kugeraho, aboneraho gusaba abitabiriye uyu muhango kwamagana buri wese washaka kugarura amacakubiri mu banyarwanda.

Uyu muyobozi yasabye kandi urubyiruko by’umwihariko, kunyomoza ibyandikwa n’abagifite ingengabitekerezo ya Jenoside bayikwirakwiza hirya no hino bakoresheje ikoranabuhanga.

Kuri uru rwibutso rwa “Commune rouge” hashyinguwe umubiri umwe  wabonetse mu Murenge wa Rugerero, ukaba wiyongereye ku mibiri 5203, yari asanzwe iharuhukiye.

Urwibutso rwa Jenoside yakorewe Abatutsi rwa Gisenyi, "Commune Rouge"