Kuri uyu wa gatanu, tariki ya 17 Kamena 2022, Intara y’Iburengerazuba yibutse abari abakozi ba Perefegitura, Superefegitura na Komini byahurijwe mu Ntara y’Iburengerazuba, bazize Jenoside yakorewe Abatutsi mu 1994.

Ni umuhango witabiriwe n’inzego zitandukanye zirimo, Abasenateri, Abadepite, Abayobozi b’Uturere, Inzego z’umutekano, Abahagarariye amadini n’amatorero n’imiryango y’abo bakozi bibukwa.

Guverineri w’Intara y’Iburengerazuba, HABITEGEKO François mu ijambo rye ry’ikaze yashimiye abaje kwifatanya n’ubuyobozi bw’Intara mu kwibuka ku nshuro ya 28 Jenoside yakorewe Abatutsi hibukwa abari abakozi ba Perefegitura za Gisenyi, Kibuye, Cyangugu na Komini Nkuli byahurijwe mu Ntara y’Iburengerazuba bazize Jenoside yakorewe Abatutsi. Umuyobozi w’Intara yagaragaje ko Jenoside yateguwe na Leta yariho mu 1994, yashishikarije Abanyarwanda bamwe kwica bagenzi babo. Ku rundi ruhande agaragaza ko hari n’abandi banyarwanda bafashe iya mbere mu kubohora Igihugu bagahagarika Jenoside, ati:” Byasabye ubwitange bukomeye, abatanze ubuzima bwabo barokora Abanyarwanda nabo turabunamiye, ubwitange bwabo nibwo butuma twibuka uyu munsi”.

Guverineri Habitegeko yasabye abayobozi mu nzego zitandukanye ko ibyabaye muri Jenoside bibaha isomo, ati: Dufite inshingano zikomeye zo gukosora amakosa yabaye. Umuyobozi w’Intara yihanganishije imiryango y’ababuze ababo bibukwa, asaba ubuyobozi bw’Uturere gukomeza kuba hafi imiryango y’aba bakozi cyane abatishoboye.

Mu kiganiro ku mateka ya Jenoside yakorewe Abatutsi cyatanzwe na Bwana Mutwarangabo Simon, yagaragaje uruhare rw’Abakoloni ndetse n’abayobozi muri Repubulika ya 1 n’iya 2, mu kubiba amacakubiri yagejeje Igihugu kuri Jenoside yakorewe Abatutsi. Yavuze ko Leta y’ubumwe yashyizeho gahunda zitandukanye zigamije kubanisha Abanyarwanda, asaba abitabiriye uyu muhango kwamagana abantu bose bashaka kubiba amacakubiri n’ingengabitekerezo ya Jenoside no guharanira kwimakaza ubumwe bw’Abanyarwanda.

Guverineri HABITEGEKO François ashyira indabo ku rwibutso

Bwana Habarugira Isaac wari uhagarariye umuryango Ibuka, yashimiye ubuyobozi bw’Intara n’Uturere kuba bwarabafashije mu bikorwa byo kwibuka abazize Jenoside ndetse hakubakwa n’inzibutso mu Turere dutandukanye asaba ko izi nzibutso zakomeza kubungwabungwa. Yagaragaje kandi ikibazo cy’abantu bishwe muri Jenoside bajugunywe mu Kiyaga cya Kivu asaba ko ku nkengero z’iki kiyaga hakubakwa urwibutso kugira ngo nabo bajye bazirikanwa.

Senateri DUSHIMIMANA Lambert

Senateri DUSHIMIMANA Lambert wari umushyitsi mukuru muri uyu muhango yashimiye ingabo zari iza FPR Inkotanyi ziyobowe na Perezida wa Repubulika Paul KAGAME,kuba zarabohoye Igihugu. Yihanganishije abarokotse Jenoside, abashimira ubutwari bw'abo kuba bataraheranwe n'agahinda abasaba gukomeza kwigirira icyizere biyubaka. Senateri Dushimimana yasabye kandi abantu bose kwamagana uwariwe wese n'icyaricyo cyose cyagarura amacakubiri mu Banyarwanda. Gusaba Abayobozi kugira ikinyuranyo mu mikorere,mu mitekerereze, batazagira imyitwarire nk’ubuyobozi bwateguye bukanashyira mu bikorwa Jenosideenoside, , abasaba kwimakaza ubumwe bamagana ingengabitekerezo ya Jenoside n’ipfobya ryayo. Yasoje asaba abantu baba bazi ahari imibiri y’abishwe muri Jenoside kuyigaragaza kugira ngo nayo ishyingurwe mu cyubahiro.

Kugeza ubu abahoze ari abakozi ba Perefegitura za Gisenyi, Kibuye, Cyangugu n’iyari Komini Nkuli muri Ruhengeri byahurijwe mu Ntara y’Iburengerazuba babashije kumenyekana ko bishwe muri Jenoside yakorewe Abatutsi bagera ku 133.