Mu birori byo gushimira abasora bo mu Ntara y’Iburengerazuba wabaye kuri uyu wa Kane, tariki ya 14 Ukwakira 2022, abacuruzi basabwe gukoresha EBM mu gutanga fagitire.Ni igikorwa cyabereye ku rwego rw’Intara mu Karere ka Rutsiro, ku wa 14 Ukwakira 2022.

Guverineri w’Intara y’Iburengerazuba, HABITEGEKO François wari umushyitsi mukuru muri uyu muhango, yagaragaje ko igikorwa cyo gushimira abasora ari umwanya wo kwibutsa akamaro k’imisoro n’amahoro mu iterambere ry’Igihugu. Yashimiye  abikorera agaragaza ko imisoro batanga yagize uruhare rugaragara mu kuzamura ubukungu n’imibereho myiza y’abaturage mu bikorwa bitandukanye, ati: “Umusanzu wanyu binyuze mu misoro n’amahoro wagize uruhare mu bikorwa bitandukanye mu Ntara, aho twavuga nk’iyubakwa ry’umuhanda wa Kivu belt (Rubavu-Rusizi) uhuza Uturere 05 tw’Intara dukora ku kiyaga cya Kivu,kugeza amazi meza ku baturage, imiturire, amashuri, umtekano, amavuriro n’ibindi…”.

Umuyobozi w’Intara yasabye abasora guhora baharanira guteza imbere Intara n’Igihugu muri rusange,basora neza, gutanga inyemezabwishyu hakoreshejwe EBM ndetse no kurwanya magendu.Abitabiriye uyu muhango basabwe kandi kugira uruhare mu kuzamura imyumvire y’abaturage ku kamaro ko gusora neza. Guverineri Habitegeko yagaragaje kandi ko Leta ifite ubushake bwo gukomeza korohereza abacuruzi no gukuraho imbogamizi zigenda zigaragara.

Umuyobozi w’Urugaga rw’Abikorera (PSF) mu Ntara, Bwana NKURUNZIZA Ernest yashimye ubufatanye buri hagati y’abikorera na Leta, avuga ko bazakomeza ubwo bufatanye kugira ngo babashe kuzamura ibikorwa by’ishoramari mu Ntara.

Guverineri Habitegeko (Hagati), Komiseri Mukuru wa RRA (i bumoso) n'umuyobozi wa PSF mu Ntara (i buryo)

Komiseri Mukuru w’Ikigo cy’imisoro n’Amahoro, BIZIMANA RUGANITWALI Pascal yagaragaje ko mu mwaka ushize wa 2021/2022, Intara y’Iburengerazuba yinjije imisoro y’imbere mu Gihugu ingana na miliyari 44.1 ku ntego yari yihaye ya miliyari 39.7. Iyi ntego ikaba yaragezweho ku kigero cya 110.9%. Ku birebana n’imisoro Ikigo cy’imisoro n’Amahoro gikusanyiriza Uturere, hakusanyijwe angana na miliyari 11.1 ku ntego ya miliyari 12.6, iyi ntego ikaba itarabashije kugerwaho.

Komiseri Mukuru wa RRA yagaragaje ko kugira ngo imisoro n’amahoro iki kigo gikusanya izakomeze kuzamuka hazashyirwa imbaraga mu kugeza EBM ku bacuruzi bose no kugenzura imikoreshereze yayo.

Muri ibi birori byo gushimira abasora, hahembwe abantu ku giti cyabo, sosiyete n’ibigo byatanze umusoro neza ndetse n’umuturage wasabye inyemezabuguzi (Facture) nyinshi hakoreshejwe EBM.Ukwezi kwahariwe gushimira abasora ku nshuro ya 20, gufite insanganyamatsiko igira iti: Dusore neza, Twubake u Rwanda twifuza.

Mu bitabiriye uyu munsi wo gushimira abasora harimo n'Abayobozi b'Uturere

Musabyimana Elizabeth wa Nyabihu yahawe igihembo cy'indashyikirwa ku kuba yarasabye fagitire nyinshi za EBM igihe cyose hari icyo aguze

PFUNDA TEA COMPANY, yahawe igihembo cy'indashyikirwa mu gutanga umusoro mwinshi kandi ku gihe.

ZABUMWANA Dorothée wa Karongi yahawe igihembo cy'intangarugero mu gutanga imisoro y'inzego z'ibanze