Kuva ku wa 21-22 Kamena 2021, Guverineri w’Intara y’Iburengerazuba, Habitegeko François, yamurikiwe ndetse anataha  bimwe mu bikorwa remezo by’iterambere byubatswe mu mwaka wa 2020/2021, n’umuryango utegamiye kuri Leta World Vision ku bufatanye n’Uturere  uyu muryango ukoreramo muri iyi Ntara.

Mu Karere ka Ngororero hatashwe ikigo cy’urubyiruko mu Murenge wa Nyange, “YESS Center” (Youth Employment Support Services),kirimo ibikoresho bijyanye n’imyuga inyuranye. Ibi bikoresho byahawe iki kigo bifite agaciro ka miliyoni ijana na mirongo itatu (130.000.000Fr) z’amafaranga yu Rwanda birimo ibikoresho by’ubwubatsi, amashanyarazi, Gusudira no gukora ibisenge by’amazu hagamijwe gufasha urubyiruko ruzagana iki kigo.

Naho mu karere ka Karongi, World Vision yamurikiye ubuyobozi bw’Akarere umuyoboro w’amazi wa Rubazo-Gasasa-Gashinge-Mubuga. Ni umuyoboro ufite uburebure bungana na 44,2km, ugeza amazi meza ku baturage basaga 16.000 bo mu mirenge ya Mubuga, Gishyita na Rwankuba.Uyu mushinga watwaye amafaranga y’u Rwanda agera kuri miliyoni 400, yatanzwe na World Vision (70%) n’akarere ka Karongi (30%).

Umuryango World Vision wamurikiye kandi Ubuyobozi bw’Akarere ka Karongi ishuri rya kijyambere ryubatswe mu Murenge wa Gihango. Ni ishuri rigizwe n’inzu igeretse rimwe, irimo ibyumba by’amashuri 8. Mu nyubako zubatswe kandi harimo ubwiherero n’icyumba cy’abakobwa. Iri shuri ryubatswe n’amafaranga agera kuri miliyoni 170 z’amafaranga y’u Rwanda. Aha abana n’abarezi bishimiye iki gikorwa bavuga ko bizabafasha kwiga neza.

Mu muhango wo gushyikiriza ku mugaragaro Uturere ibikorwa bitandukanye by’akozwe mu Turere tw’Intara y’Iburengerazuba, uwari uhagarariye World Vision muri iki gikorwa, Bwana Ananias Sentozi, yishimiye ubufatanye uyu muryango ufitanye na Leta y’u Rwanda, ashimangira ko ibikorwa byabo bizakomeza ku bufatanye n’Uturere aho yagize ati: “Ntabwo twaje gusoza ibikorwa byacu muri iyi Ntara y’Iburengerazuba ahubwo twaje kubishimangira, hari ibindi bikorwa bitandukanye duteganya gukorana n’Uturere two muri iyi Ntara birimo gukomeza kugeza amazi meza ku baturage aho abaturage bagera ku bihumbi 300 bazabona amazi meza muri iyi myaka ibiri iri imbere”.

Guverineri Habitegeko François, yashimiye umuryango World vision n’Uturere ku mikoranire myiza mu gukemura ibibazo bibangamiye imibereho myiza y’abaturage. Yasabye ubuyobozi bw’Akarere kurinda ibi bikorwa no kubibungabunga. Umuyobozi w’Intara kandi yashimangiye ko Leta y’u Rwanda ifatanyije n’abafatanyabikorwa banyuranye, bazakomeza kwegereza abaturage ibikorwa remezo bibafasha kugira imibereho myiza.

Uretse ibi bikorwa byamuritswe mu Turere twa Ngororero, Karongi na Rutsiro, hari ibindi bikorwa binyuranye byagezweho mu Turere twa Rusizi, Nyamasheke,  Ngororero na Nyabihu, inyandiko zikubiyemo ibyakozwe byose zikaba zarashyikirijwe utwo Turere ku mugaragaro.