Intara y’Iburengerazuba ku bufatanye na MINALOC ndetse na Polisi y’Igihugu,  ku wa 18 - 22 Nyakanga 2022, yateguye amahugurwa y’urubyiruko rw’abakorerabushake 278, bahagarariye abandi baturutse mu Turere 07 tugize Intara y’Iburengerazuba, amahugurwa yabereye mu kigo cy’amahugurwa cya Polisi i Gishari mu Karere ka Rwamagana. Aya mahugurwa yari agamije kubongerera ubumenyi kugira ngo bashobore kugira uruhare muri gahunda zitandukanye z’Igihugu zigamije guhindura imibereho y’Abaturage. Ni amahugurwa yari afite insanganyamatsiko igira iti:”Urungano rufite intego”.

Atangiza ku mugaragaro aya mahugurwa, Minisitiri w’Ubutegetsi bw’Igihugu, Gatabazi Jean Marie Vianney, yasabye uru rubyiruko kubyaza umusaruro amahirwe Igihugu cyabahaye biteza imbere, birinda ibyabarangaza bashyira imbere ubumwe bwabo. Minister Gatabazi yibukije uru rubyiruko ko Leta y'Ubumwe bw'Abanyarwanda ibaha agaciro gakomeye nk'imbaraga z'Igihugu, abasaba gukomeza kwigirira icyizere.

Minisitiri Gatabazi yashimiye urubyiruko rw'abakorerabushake ku ruhare bagize mu gukangurira abaturage kwirinda ikwirakwira ry’icyorezo cya Covid-19.

Mu kiganiro cyatanzwe na Guverineri w’Intara y’Iburengerazuba, Habitegeko François ku ruhare rw'urubyiruko mu mpinduramatwara, yagaragaje ko urubyiruko ari imbaraga z'Igihugu abasaba kugira uruhare mu gukemura ibibazo bibangamiye imibereho myiza y’abaturage.

Guverineri Habitegeko ati:”Impinduramatwara ishobora kuba nziza cyangwa mbi, mwebwe rero murasabwa kuzana impinduramatwara nziza”.Yabasabye kandi kugira ubwitange, gukora cyane no kwigirira icyizere.

Muri aya mahugurwa urubyiruko rwahawe amasomo atandukanye n’abayobozi mu nzego z’Igihugu yabafashije kumenya gahunda zitandukanye za Leta n’uruhare rwabo mu iterambere ry’Igihugu.

Asoza aya mahugurwa, Minisitiri w’Umutekano imbere mu Gihugu, Gasana Alfred yagaragaje ko mu Gihugu hari umutekano, kuba uhari ngo ni umusaruro w'ubufatanye bw'abaturage, abayobozi n'inzego z'umutekano.

Minisitiri Gasana yakomeje agira ati: “N'ubwo hari umutekano, hari ibyaha bigenda bigaragara hirya no hino mu Gihugu nk'urubyiruko mugomba gukumira, birimo ubujura, kunywa no gucuruza ibiyobyabwenge, ubusinzi, gusambanya abana n’ibindi”

Minisitiri w'Umutekano yasabye kandi urubyiruko rw'abakorerabushake kugira uruhare mu kwamagana abasebya Igihugu bakoresheje imbuga nkoranyambaga, ati: “Indangagaciro twigishwa zigomba kuturanga, dukangurira bagenzi bacu kuva mu bikorwa bitari byiza tubagira inama.”

Abayobozi b'Uturere bitabiriye itangizwa ry'aya mahugurwa

Nyuma y'aya mahugurwa, urubyiruko rw'abakorerabushake basinyanye imihigo n’Umuyobozi w’Intara ndetse n’abayobozi b’Uturere twabo, iyi mihigo ikaba izibanda cyane cyane ku bikorwa birimo;

Kurwanya isuri hakorwa amaterasi ku buso bwa ha 556, Gukora ubukangurambaga mu rubyiruko mu kwihangira imirimo, Gushishikariza urubyiruko kwizigamira muri Ejo Heza, Kubakira abatishoboye amazu 96, Kubaka no gusana ubwiherero 1375, Kuvugurura amazu ameze nka Nyakatsi, Kurandura ikibazo cy'abana bari mu mirire mibi, Gukurikirana imikorere y'ibigo mbonezamikurire no kugarura mu ishuri abana bose baritaye, Kurwanya ingengabitekerezo ya Jenoside,Gukora ubukangurambaga bwo kurwanya ibiyobyabwenge, kurwanya amakimbirane mu ngo, gushishikariza urubyiruko no kubigisha gukoresha imbuga nkoranyambaga.

Uru rubyiruko rw'abakorerabushake bari bamaze iminsi 5 mu mahugurwa bahawe icyemezo (Certificat) ku kuba barakurikiranye neza aya mahugurwa ndetse batatu muri buri Karere bahize abandi bahabwa telefoni igezweho (smart phone).

Minisitiri Gasana aha icyemezo umwe mu batozwa

Guverineri Habitegeko François asinyana imihigo n'urubyiruko rw'abakorerabushake

Umuyobozi w'Akarere ka Nyabihu, asinyana imihigo n'urubyiruko rw'ako Karere.