Mu nama nyunguranabitekerezo ku iterambere ry’Intara y’Iburengerazuba yabaye ku wa 12 Werurwe 2022, kuri Lemigo Hotel i Kigali, abashoramari basabwe kugira uruhare mu gukemura ibibazo bibangamiye iterambere ryayo.

Ni inama yitabiriwe na Minisitiri w’Ubutegetsi bw’Igihugu, Gatabazi Jean Marie Vianney, abavuga rikumvikana barimo Abasenateri n’Abadepite, Abashoramari bakorera n’abakomoka mu Ntara y’Iburengerazuba.

Mu kiganiro yatanze na Guverineri w’Intara y’Iburengerazuba, Habitegeko François, yagaragaje imiterere y’Intara, amahirwe y’ishoramari n’ibibazo bikibangaiye iterambere ry’Intara.

Mu mahirwe y’ishoramari ari mu Ntara y’Iburengerazuba, Guverineri Habitegeko yagararaje harimo; ubucuruzi bwambukiranya umupaka, gutunganya ibyanya by’inganda muri Rusizi na Rubavu, Gushora imari mu mukino yo mu mazi n’imyidagaduro, Ubwikorezi bwo mu mazi(uruganda rukora amato), Ibyambu ku kiyaga cya Kivu biri kubakwa, Gutunganya umusaruro w’amabuye y’agaciro no kubaka amahoteri.

Mu bibazo byagaragajwe bibangamiye iterambere ry’Intara, havuzwe ibijyanye n’ibikorwa remezo bidahagije, ibibazo bibangamiye umudendezo w’umuryango birimo ihohoterwa, amacumbi ku batishoboye, abana bata ishuri, inda ziterwa abangavu; umusaruro muke w’ubuhinzi , umusaruro utabasha kongererwa agaciro, ibibazo mu masoko y’umusaruro, ingaruka ku mihindagurikire y’ibihe n’ibiza ndetse n’ubucukuzi bwa mine na kariyeri bwangiza ibidukikije.

Havuzwe kandi ku bibazo bijyanye n’imiturire y’icyaro itanoze, iterambere ry’Imijyi rikiri hasi, ubushomeri mu rubyiruko, ishoramari rito n’ibikorwa remezo mu mikino n’imyidagaduro bidahagije.

Minisitiri w’Ubutegetsi bw’Igihugu, GATABAZI Jean Mari Vianney yavuze ko Intara y’Iburengerazuba ifite amahirwe menshi asaba ko ishoramari ryakwiyongera muri iyi Ntara kugira ngo n’abaturage benshi bashobore kubona imirimo ibateza imbere.

Minisitiri Gatabazi yagaragaje ko iterambere ry’Igihugu rishingiye ku bashoramari, asaba ubuyobozi bw’Uturere tugize Intara kujya baborohereza babaha serivisi nziza. Abikorera nabo basabwe kubyaza umusaruro amahirwe ari muri iyi Ntara ihana umupaka n’Igihugu cya Congo cyane ko hari isoko rinini kugeza ubu u Rwanda rudahaza.

Muri iyi nama abikorera bagaragaje imbogamizi bagenda bahura nazo mu ishoramari ryabo zirimo ibikorwa remezo nk’imihanda bitameze neza ndetse n’amazi n’umuriro bidahagije mu duce tumwe. Ubuyobozi bw’Intara n’Uturere tuyigize bukaba bwarasabwe gukurikirana ibyo bibazo, kubikorera ubuvugizi ku bisaba uruhare rw’izindi nzego no kubishakira ibisubizo ku byo bafitiye ubushobozi.