Nyabihu: Mu kwizihiza umunsi mukuru w’abahinzi b’Ibireti, abahinzi b’indashyikirwa bagabiwe Inka.

Mu Karere ka Nyabihu, Umurenge wa Kabatwa niho hizihirijwe umunsi mukuru w’abahinzi b’ibireti. Uyu munsi ngarukamwaka utegurwa na sosiyete igura ikanatunganya iki gihingwa, Orizon SOPYRWA mu rwego rwo gushimira abahinzi b’ibireti ku musaruro babonye ndetse no kubashishikariza kurushaho kwita kuri iki gihingwa hongerwa umusaruro mu bwiza no mu bwinshi. 

Iki gikorwa cyitabiriwe na Guverineri w’Intara y’Iburengerazuba, cyahuje abahinzi b’ibireti bo mu Turere twa Nyabihu na Rubavu ndetse n’abayobozi b’Utwo Turere. Guverineri w’Intara, Ntibitura Jean Bosco mu ijambo rye, yashimye umuhate, ubwitange, n’ubudacogora by’abahinzi b’ibireti ndetse n’umusanzu wabo mu iterambere ry’Intara n’Igihugu muri rusange. Yagaragaje ko ibireti ari igihingwa ngengabukungu cy’ingenzi cy’injiriza igihugu amadevize, kivamo imiti ifasha mu kurwanya ibyonnyi byangiza ibihingwa n’amatungo, ari nako abahinzi bagikuraho amafaranga abafasha kwiteza imbere. 

Abahinzi b'ibireti bashimiwe ku kongera umusaruro mu bwiza no mu bwinshi

Umuyobozi w’Intara yashimiye by’umwihariko amakoperative 08 y’abahinzi b’ibireti ahuriye mu ihuriro RPCU (Rwanda Pyrethrum Cooperative Union), atuma abahinzi bagira ijwi rikomeye, bakabona serivisi n’ubumenyi ku buryo bworoshye kandi bagakorera hamwe mu kuzamura umusaruro n’agaciro kawo. Uyu musaruro ushimishije ngo ushingiye ku bufatanye hagati y’abahinzi, koperative z’abahinzi b’ibireti, abayobozi b’inzego z’ibanze, Horizon SOPYRWA ndetse n’inzego za Leta, zirimo NAEB, RAB, na RCA. Hagaragajwe ko ubu bufatanye bukomeye mu buhinzi muri rusange ariko cyane cyane mu bushakashatsi no mu guteza imbere ubutubuzi bw’imbuto, bikomeje kongera umusaruro, kuzamura ubuziranenge no kunoza imibereho myiza y’abahinzi ndetse bikagera no ku mafaranga abahinzi babona mu musaruro w’ibireti.

Umuyobozi mukuru wa Orizon SOPYRWA, Bwana BIZIMUNGU Gabriel, yashimiye abahinzi ku kongera musaruro ku bwinshi n’ubwiza muri uyu mwaka ushize wa 2025, agaragaza ko abahinzi b’ibireti bo mu Turere twa Rubavu na Nyabihu babonye umusaruro w’ibireti ugera kuri toni 1620, uyu ukaba ungana na 70% by’umusaruro wose winjira mu ruganda rutunganya ibireti. Umusaruro wose uruganda rwakiriye harimo n’uwavuye mu Turere twa Musanze na Burera ugera kuri toni 2160, bivuze ko hiyongereyeho gusa toni 500. Bwana Bizimungu yashimiye cyane abahinzi ba Nyabihu na Rubavu ku musaruro ushimishije bagezeho, aho izi T1620 abaturage basaruye wabinjirije amafaranga y’u Rwanda angana na miliyari 2,4. 

Mu bikorwa Orizon SOPYRWA ifashamo abaturage, harimo kubashakira ifumbire ndetse no kubaha ubwasisi. Ni muri urwo rwego muri uyu mwaka abahinzi b’indashyikirwa bahawe Inka 10, izi ziyongera ku zindi 53 abaturage bituye bagenzi babo. Uretse izi nka, abahinzi bose bahawe matela, amasuka ndetse na Shitingi. Muri rusange abahinzi b’ibireti muri Nyabihu na Rubavu bagera kuri 350 nibo bahawe ibihembo.

Ibireti bivamo imiti ifasha mu kurwanya ibyonnyi byangiza ibihingwa n’amatungo